ພິທີປະກາດການຈັດຕັ້ງດັ່ງກ່າວໄດ້ຈັດຂື້ນໃນຕອນບ່າຍວັນທີ 25 ຕຸລາ 2022 ທີ່ຫ້ອງວ່າການແຂວງຄໍາມ່ວນ ໂດຍການເປັນກຽດເຂົ້າຮ່ວມຂອງ ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ, ທ່ານ ຄໍາໜັ້ນ ສໍປະເສີດ ຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ, ມີຄະນະຈັດຕັ້ງແຂວງ, ພະແນກການອ້ອມຂ້າງ, ຕະຫລອດຮອດບັນດາຫ້ອງການ ຊສ ໃນ 10 ຕົວເມືອງ ແລະ ພະນັກງານ-ລັດຖະກອນ ພະແນກ ຊສ ແຂວງເຂົ້າຮ່ວມຢ່າງພ້ອມພຽງ.
.
ໃນພິທີອັນມີຄວາມໝາຍ, ຄວາມສໍາຄັນ ທ່ານ ນາງ ມຸນທາ ລັດຖະຈັກ ຮອງຫົວໜ້າຄະນະຈັດຕັ້ງແຂວງຄໍາມ່ວນ ໄດ້ເປັນກຽດຜ່ານຂໍ້ຕົກລົງຂອງຂອງ ທ່ານເຈົ້າແຂວງຄຳມ່ວນ ສະບັບເລກທີ 202/ຈຂ, ວ່າດ້ວຍ ການແຕ່ງຕັ້ງຮອງຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງຄຳມ່ວນ ຈໍານວນ 2 ທ່ານ, ປະກອບມີ: ທ່ານ ສີປະໄທ ເພົາພົງສະຫວັດ ຮອງເລຂາຄະນະພັກຮາກຖານ, ຫົວໜ້າຂະແໜງສິ່ງແວດລ້ອມ, ເປັນຮອງຫົວໜ້າພະແນກ ຊສ ແຂວງຄຳມ່ວນ ແລະ ທ່ານ ແກ້ວບຸນຂັວນ ໄຊຍະວົງສາ ຄະນະພັກຮາກຖານ, ຫົວໜ້າຫ້ອງການບໍລິຫານ, ແຜນການ ແລະ ການເງິນ, ເປັນຮອງຫົວໜ້າພະແນກ ຊັບພະຍາອກນທໍາມະຊາດ ແລະ ສິ່ງແວດລ້ອມ ແຂວງຄໍາມ່ວນ. ນອກນີ້, ພິທີຍັງໄດ້ຮັບຟັງ ການລາຍງານຜົນການຈັດຕັ້ງປະຕິບັດເຄື່ອນໄຫວວຽກງານ 9 ເດືອນຜ່ານມາ ແລະ ທິດທາງແຜນການ 3 ເດືອນ ທ້າຍປີ 2022, ທີ່ສະເໜີໂດຍ ທ່ານ ຄໍາໝັ້ນ ສໍປະເສີດ ຫົວໜ້າພະແນກ ຊສ ແຂວງຄຳມ່ວນ ເຊິ່ງໄດ້ຍົກໃຫ້ເຫັນຜົນງານທີພົ້ນເດັ່ນໃນຫຼາຍດ້ານ, ຕະຫຼອດເຖິງດ້ານດີ ແລະ ດ້ານອ່ອນ, ຂໍ້ຄົງຄ້າງທີ່ຈະຕ້ອງໄດ້ສືບຕໍ່ປັບປຸງແກ້ໄຂ, ພ້ອມທັງບົດຮຽນທີ່ຖອດຖອນໄດ້ ແລະ ແຜນວຽກຈຸດສຸມໃນ 3 ເດືອນຕໍ່ໜ້າ ທີ່ພະແນກຊັບພາກອນທໍາມະຊາດ ແລະ ສິ່ງແວດລ້ອມແຂວງ ຈະຕ້ອງໄດ້ເອົາໃຈໃສ່ຊີ້ນໍາ ຂະແໜງການ ແລະ ຫ້ອງການ ຊສ 10 ຕົວເມືອງ ໃນການຜັນຂະຫຍາຍບັນດານະໂຍບາຍຕ່າງໆ ທີ່ພົວພັນກັບວຽກງານທີ່ດິນ, ສິ່ງແວດລ້ອມ, ນ້ຳ, ອຸຕຸນິຍົມ ແລະ ອຸທົກກະສາດ ທີ່ລັດຖະບານໄດ້ກຳນົດມາແລ້ວນັ້ນໃຫ້ຄົບຖ້ວນ ແລະ ກ້ວາງຂວາງອອກຕື່ມ.
ໂອກາດດັ່ງກ່າວນີ້ ພິທີຍັງໄດ້ຮັບຟັງການໂອ້ລົມ ແລະ ໃຫ້ທິດຊີ້ນໍາ ຂອງທ່ານ ວັນໄຊ ພອງສະຫັວນ ເຈົ້າ ແຂວງໆ ຄໍາມ່ວນ ທີ່ໄດ້ເນັ້ນໜັກໃນຫລາຍບັນຫາ ເປັນຕົ້ນແມ່ນ: ມອບໃຫ້ຄະນະພັກ ຄະນະພະແນກ ຊສ ສຶບຕໍ່ເອົາໃຈໃສ່ວຽກງານສຶກສາອົບຮົມການເມືອງ-ແນວຄິດ ໃຫ້ພະນັກງານ-ລັດຖະກອນທີຢູ່ໃນຄວາມຮັບຜິດຊອບຂອງຕົນໃຫ້ເປັນປົກກະຕິ, ເພີ່ມທະວີການນໍາພາ-ຊີ້ນໍາຂອງຄະນະພັກ, ຄະນະພະແນກ, ຄະນະຂະແໜງ, ຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມເມືອງ, ເປັນເສນາທິການ ໃຫ້ແກ່ການຈັດຕັ້ງແຕ່ລະຂັ້ນ, ພ້ອມກັນແກ້ໄຂ້ບັນຫາປະກົດການຫຍໍ້ທໍ້ຕ່າງໆ ທີເກີດຂຶ້ນໃນຖັນແຖວພະນັກ-ລັດຖະກອນຂອງຕົນ ໃຫ້ຖືກຕ້ອງ ຕາມລະບຽບກົດໝາຍ, ສຶບຕໍ່ເອົາໃຈໃສ່ປັບປຸງກົງຈັກການຈັດຕັ້ງໃຫ້ສົມຄູ່ກັບພາລະບົດບາດ ລວມທັງກວດກາ ການນໍາພາ-ຊີ້ນໍາຮອບດ້ານ, ໃຫ້ຕິດພັນກັບການຈັດຕັ້ງປະຕິບັດວຽກງານວິຊາສະເພາະ, ເອົາໃຈໃສ່ປະສານສົມທົບລະຫວ່າງສາຍຕັ້ງ, ສາຍຂວາງ, ບັນດາຫ້ອງການ ຊັບເມືອງ, ບ້ານ ໃນການແກ້ໄຂ້ບັນຫາທີ່ດິນ, ບັນຫາສິ່ງແວດລ້ອມໃນຂົງເຂດຊັບ ພະຍາກອນທໍາມະຊາດ ແລະ ສິ່ງແວດລ້ອມ ທີຕິດພັນກັບສັງຄົມ, ພໍ່ແມ່ປະຊາຊົນ ແລະ ຫຼາຍພາກສ່ວນ ເພື່ອເຮັດໃຫ້ບັນຫາເຫຼົ່ານັ້ນຫຼຸດໜ້ອຍຖ້ອຍລົງ, ສືບຕໍ່ເອົາໃຈໃສ່ເຕົ້າໂຮມຄວາມສາມັກຄີເປັນເອກະພາບພາຍໃນພັກ, ກໍ່ຄືໝູ່ຄະນະໃຫ້ມີຄວາມໜັກແໜ້ນ, ເອົາໃຈໃສ່ເພີ່ມທະວີໃນການບຳລຸງກໍ່ສ້າງພະນັກງານຂອງຕົນ ໃຫ້ມີຄວາມເຂັ້ມແຂງທາງດ້ານເຕັກນິກວິຊາການ ທີ່ສໍາຄັນໃຫ້ຍືດໝັ້ນໃນຈັນຍາບັນ, ຈັນຍາທໍາຂອງພະນັກງານ-ລັດຖະກອນ ໃນການປະຕິບັດໜ້າທີ່ວິຊາສະເພາະ, ສຳລັບບັນດາທ່ານທີ່ໄດ້ຮັບການແຕ່ງຕັ້ງປະກາດໃນຄັ້ງນີ້ ກໍ່ຕ້ອງເພີ່ມທະວີຍົກສູງຄວາມຮັບຜິດຊອບ, ຄວາມເປັນເຈົ້າໃນການປະຕິບັດໜ້າທີ່ການເມືອງທີ່ໄດ້ຮັບມອບໝາຍ, ພ້ອມກັນບຸກບືນ ເອົາໃຈໃສ່ຊອກຮູ້ຮ່ຳຮຽນນຳຂັ້ນເທິງ, ນຳເພື່ອນຮ່ວມງານ ແລະ ຮັບຟັງຄຳຄິດຄໍາເຫັນຂອງໝູ່ຄະນະ ເພື່ອພ້ອມກັນນຳພາ-ຊີ້ນຳວຽກງານຊັບພະຍາກອນທຳມະຊາດ ແລະ ສິ່ງແວດລ້ອມ ໃຫ້ມີຜົນສຳເລັດດີຂຶ້ນ.
